မိခင်ဘာသာဖြင့် ယူနီကုဒ် စံနစ်သုံး အင်တာနက်လိပ်စာများ (URL) အား သုံးစွဲနိုင်တော့မည်

alt

အွန်လိုင်း အင်တာနက် လောက၏ အကြီး အကျယ်ဆုံး ပြောင်းလဲမှု တခုအဖြစ် အင်္ဂလိပ်စာ မဟုတ်သည့် ကိုယ်ပိုင် မိခင် ဘာသာရပ် စာပေများဖြင့် သုံးစွဲ နိုင်တော့မည့်

အင်တာနက် လိပ်စာများ (URL) အား ကိုရီးယားနိုင်ငံ ဆိုလ်း မြို့တွင် ကျင်းပသော အင်တာနက် ဆိုင်ရာ အမည်နှင့် နံပါတ်များ ခွဲရေးအဖွဲ့၏ အောက်တိုဘာ ၂၆ရက်မှ ၃၀ရက်ထိ ကျင်းပခဲ့သော အစည်းဝေး က အတည်ပြု ပေးလိုက်ပြီ ဖြစ်သည်။

အဆိုပါ သတ်မှတ်ချက်အရ နိုင်ငံတကာ အသိအမှတ်ပြု ယူနီကုဒ် စံသတ်မှတ်ကို လိုက်နာထားသည့် စာပေဖြစ်ရမည် ဖြစ်ပြီး၊ ကိန်းဂဏန်း များဖြင့် အစပြုခြင်း၊ အဆုံးသတ်ခြင်းများ မရကြောင်း၊ သက်ဆိုင်ရာ နိုင်ငံ၏ တာဝန်ရှိသူများနှင့် အာဏာပိုင် အဖွဲ့အစည်းများမှ အဆိုပြုချက်များ တင်သွင်းနိုင်ပြီ ဖြစ်ကြောင်း သိရှိရသည်။

၁.၆ ဘီလီယံ ကျော်သော အင်္ဂလိပ် ဘာသာစကား အသုံးနည်းသည့် အင်တာနက် သုံးစွဲသူများ အတွက် များစွာ အထောက်အကူ ပြုလာမည် ဖြစ်ကာ အမြဲမပြတ် ဆက်သွယ်ထားမည့် “တကမ္ဘာ၊ အင်တာနက် တခု” တပြေးညီ ဆောင်ပုဒ် အတိုင်း၊ အွန်လိုင်း အင်တာနက် စံနစ်ကို ပြောင်းလဲသွားနိုင်မည့် သမိုင်းဝင် အဖြစ်အပျက် တခုဖြစ်လာမည် ဖြစ်သည်။ လတ်တလော အခြေအနေတွင် တရုတ်၊ ကိုရီးယား၊ စသည့် ဘာသာများတွင် စမ်းသပ် သုံးစွဲနေကြသော်လည်း၊ ကွန်ပြူတာတိုင်း နားလည်မှု မရှိသေးခြင်း၊ ဘာသာဗေဒ အခက်အခဲများ ကြံုတွေ့နေရခြင်း များကြောင့် အဆင်ပြေမှု မရှိသေးသော်လည်း ၂၀၁၀ ခုနှစ် အနှောင်းပိုင်းတွင် မိခင်ဘာသာ များဖြင့် အင်တာနက် လိပ်စာများ (URL) အား စတင် အသုံးပြုနိုုင်ရန် မျှော်မှန်းထားကြသည်။

အင်တာနက် လိပ်စာများ URL (Uniform Resource Locator, previously Universal Resource Locator) ဆိုသည်မှာ ယေဘုယျအားဖြင့် အင်တာနက်ဟု ခေါ်ဆိုသော် ကမ္ဘာနှင့်အဝှမ်း ဆက်သွယ်ထားသည့် အွန်လိုင်းပေါ်ရှိ လိပ်စာအမည် ဖြစ်သည်။ မိမိနေထိုင်ရာ ဒေသ မြို့နယ်၊ ကျေးရွာ အလိုက် သတ်မှတ် ပိုင်းခြားထားသော နေအိမ်များ၏ အိမ်လိပ်စာ ကဲ့သို့ အင်တာနက် အွန်လိုင်းတွင် ရှိမည့်နေအိမ် လိပ်စာတခုပင် ဖြစ်ပေသည်။ လက်ရှိတွင် အင်္ဂလိပ်ဘာသာဖြင့် မည့်ခေါ်ထားပြီး ဖြစ်သည့် လိပ်စာများရှိနေပြီး ဖြစ်သော်လည်း၊ ကမ္ဘာနှင့်အဝှမ်း တိုးတက် သုံးစွဲလာနေကြသည် ဦးရေများကြောင့် လုံလောက်မှု အားနည်းခြင်း များကို ဖြည့်ဆည်းရန်၊ အင်္ဂလိပ် ဘာသာစကား အသုံးမပြုသော နိုင်ငံများမှ သုံးစွဲသူများအတွက် အဆင်ပြေ အလွယ်တကူ မှတ်မိ လာစေရန် စသည့် အချက်များကို အခြေခံကာ ယူနီကုဒ် စနစ်သုံး မိခင်ဘာသာဖြင့် အင်တာနက်လိပ်စာများ (URL) အားသုံးစွဲရန် အတည်ပြုပေးခဲ့ခြင်း ဖြစ်သည်။

မြန်မာနိုင်ငံမှာ စီးပွားရေးလုပ်ငန်းများ၊ စာပေ အနုပညာရှင်များ၊ မီဒီယာများ၊ ပုဂ္ဂိုလ်ရေးဆိုင်ရာ အင်တာနက် လိပ်စာများမှာလည်း သောင်းဂဏန်းမျှ ရှိလာနေပြီ ဖြစ်သည်။ မြန်မာနိုင်ငံအနေဖြင့် မြန်မာဘာသာနှင့် သုံးစွဲရန် အခွင့်အရေး များစွာရှိပါသည်။ မြန်မာဘာသာအား ယူနီကုဒ် ကွန်ဆိုတီယမ် ဟုခေါ်သော နိုင်ငံတကာ စံပြုရေးအဖွဲ့တွင် မြန်မာစာနှင့် တိုင်းရင်းသား ဘာသာစကားများ အတွက် လက်ခံ အသိအမှတ်ပြု လုပ်ဆောင်ထားနိုင်ခဲ့ပြီး ဖြစ်သည့်အပြင်၊ နိုင်ငံတော် အစိုးရအနေဖြင့် တောင်းဆိုမည် ဆိုပါက မကြာသော အချိန်ကာလ တခုတွင် စတင်နိုင်မည် ဖြစ်သော်လည်း၊ ကွန်ပြူတာသုံး မြန်မာ ဝေါ်ဟာရများအား မြန်မာမှုပြုရေး၊ မြန်မာ ဘာသာသို့ ပြန်ဆိုရေးနှင့် အခြား နည်းပညာဆိုင်ရာ ကိစ္စရပ်များ အတွက် အချိန်ပေးရဦးမည် သည့်အတွက် မြန်မာဘာသာဖြင့် သုံးစွဲနိုင်စေရန် အချိန်အတိုင်း တခုအထိ ထပ်မံ စောင့်ဆိုင်းရန် လိုနေဦးမည် ဖြစ်သည်။

လတ်တလော အခြေအနေတွင် အာရေဗီ ဘာသာ၊ တရုတ်၊ ကိုရီးယား၊ ဂျပန် နှင့် ရှရှား ဘာသာများ အတွက် များမကြာမီ အချိန် ကာလတခုတွင် စတင်သုံးစွဲ လာကြတော့မည့် ဖြစ်သည့်အတွက် သမိုင်းဝင် ခြေလှမ်းအဖြစ် ကမ္ဘာရွာကြီး တခုမှ ကမ္ဘာကြီး တခုလုံးကို မိခင်ဘာသာ စကားများဖြင့် အမြဲချိတ်ဆက် ထားနိုင်တော့မည် ဖြစ်သည်ဟု သိရှိရသည်။

LEAVE A REPLY

Please enter your comment!
Please enter your name here