ဧရာ ယူနီကုဒ် မြန်မာစာလုံးသစ် ထွက်ရှိလာ

alt

မြန်မာ အင်တာနက် အွန်လိုင်းမီဒီယာ သုံးစွဲမှု တဟုန်ထိုး ဖွံ့ဖြိုးလာသည့် အလျှောက် မြန်မာစာသုံး အွန်လိုင်း စာမျက်နှာ ဝဘ်ဆိုဒ်များ၊ ဘလော့ဂ် များတွင် အသုံးပြုနိုင်ရန် ရည်သန်ကာ ယခု ထုတ်လွှင့်လိုက်သော

ဧရာ ယူနီကုဒ် အက္ခရာစာလုံး (Font) စံနစ်သည် မြန်မာစာနှင့် မြန်မာ တိုင်းရင်းသား စာလုံးများ အပါအဝင် ခေတ်သစ် နိုင်ငံတကာ စာပေရေးထုံး စံနစ်သစ် ဖြစ်ကာ အခမဲ့ မည်သူမဆို ယူငင် သုံးစွဲနိုင်သည်ဟု ၎င်း ဧရာယူနီကုဒ် ဝဘ်ဆိုဒ်တွင် ဖေါ်ပြ ထားသည်။

ယင်း ဝဘ်ဆိုဒ်တွင် ဖေါ်ပြထားချက်များ အရ ထိုဧရာ ယူနီကုဒ် စာလုံးသည်၊ ယူနီကုဒ် အက္ခရာ စံနစ်အရ မြန်မာ အက္ခရာများကို Universal Character Set ဟုခေါ်သော ကမ္ဘာသုံး အက္ခရာ ဇယားတွင် အတိအကျ နေရာချထားပြီး ဖြစ်သည့်အတွက် ဤစနစ်ကို လိုက်နာပါက မြန်မာ အက္ခရာများသည် နိုင်ငံတကာ အက္ခရာ ရေးထုံးစံနစ်တွင် အံဝင်စေသဖြင့် စံလွဲနိုင်သည့် ပြဿနာများ မရှိနိုင်ဘဲ၊ ကွန်ပြူတာဖြင့် စာစီရာတွင်ဖြစ်စေ၊ စာလုံး ပြောင်းရာတွင် ဖြစ်စေ စာလုံးအရွယ်နှင့် အထားအသိုများ မှန်ကန်စေခြင်း၊ ကွန်ပြူတာ စံနစ်ဖြင့် သိုမှီးထားသော အချက်အလက် များကို စံနစ်တကျ ပြန်လည်ရှာဖွေရန် လွယ်ကူစေခြင်း၊ အင်တာနက် အွန်လိုင်း သုံးစွဲရာတွင် အက္ခရာစာလုံး (Font) စံနစ်များ ညီညွတ်သဖြင့် စာလုံးများကို မှန်ကန်စွာ မြင်ရခြင်းစသည့် အထောက်အကူများ ရရှိမည် ဖြစ်ကြောင်း သိရှိရသည်။

နောက်ဆုံး ထွက်ရှိလာသည့် ဧရာ ယူနီကုဒ် စာလုံးများသည်၊ နိုင်ငံတကာ ယူနီကုဒ် စနစ် ၅.၂ အတိုင်း ပြုစုထားသော စာလုံးများ ဖြစ်သည်ဟု သိရှိရပြီး၊ ဧရာယူနီကုဒ် စာလုံး ဖြစ်ပေါ်ရေး အတွက် ပြည်တွင်း ပြည်ပရှိ မြန်မာယူနီကုဒ် ပညာရှင်များ၊ မြန်မာဂရပ်ဖစ် ဒီဇိုင်း ပညာရှင်များ နှင့် တိုင်းရင်းသား ယူနီကုဒ် စာလုံးများကို လေ့လာ နေသော ထိုင်းနိုင်ငံ ဇင်းမယ် တက္ကသိုလ်ရှိ ပညာရှင်များက ပူးပေါင်း ကြိုးပမ်းသည့် ရလဒ် တခုဖြစ်ကြောင်းလဲ သိရှိရသည်။

ဧရာ ယူနီကုဒ် မြန်မာစာလုံးသည် မြန်မာ လက်နှိပ်စက် စံနစ်နှင့် ပုံနှိပ် ခဲစာလုံးပုံစံ ကို အခြေခံပြီး၊ မြန်မာစာ ရေးထုံးနှင့် အဆင်ပြေအောင် ကြိုးပမ်းလျှက် ရှိကာ၊ လက်ရှိ အခြေအနေတွင် အွန်လိုင်း မီဒီယာများ၊ ပုံနှိပ် လုပ်ငန်းများ အတွက် အဆင်ပြေရန် ဆောင်ရွက် ထားသည်ဟု ဆိုသည်။ မကြာမီ ကာလအတွင်း ဧရာ ယူနီကုဒ် မြန်မာစာလုံး အက္ခရာ ဒီဇိုင်းသစ်များနှင့် ထွက်ရှိလာမည့် မြန်မာတိုင်းရင်းသား ဘာသာများ ဖြစ်သော ကရင်၊ ရှမ်း၊ မွန် စသည့် စာလုံးများ အားလည်း အခမဲ့ ဖြန့်ချီပေးသွားမည် ဖြစ်ကြောင်းလည်း သိရှိရသည်။

ဧရာယူနီကုဒ် မြန်မာစာလုံးများ ကို စီးပွားရေး အရ ဖန်တီးခဲ့ခြင်း မဟုတ်ပဲ၊ လွတ်လပ်သော နည်းပညာရင်းမြစ် (open source) အဖြစ်သာ ဖန်တီးပြီး၊ ဧရာအဖွဲ့၏ ခွင့်ပြုချက်ဖြင့် မည်သူမဆို လွတ်လပ်စွာ ထပ်ဆင့်ပြုပြင် ဖန်တီး နိုင်ကြကြောင်း၊ ဧရာယူနီကုဒ် မြန်မာစာလုံးများသည် လူပုဂ္ဂိုလ်၊ အဖွဲ့အစည်း တခု၏ ပိုင်ဆိုင်မှုမျိုး မဟုတ်ဘဲ၊ မြန်မာ အသိုင်းအဝိုင်း တခုလုံး၏ ပိုင်ဆိုင်မှု တခုအဖြစ် ရပ်တည်ပြီး၊ မည်သူမဆို ပူးပေါင်းပါဝင် ကြိုးပမ်း ဆောင်ရွက်နိုင်သည့် အဖွဲ့တခု ဖြစ်ကြောင်း၊ နည်းပညာ ကျွမ်းကျင် ပညာရှင်များ အားလည်း ပူးပေါင်း ပါဝင် ဖိတ်ခေါ်ကြောင်း သိရှိရသည်။

ဧရာ ယူနီကုဒ် မြန်မာစာလုံးများ နှင့် ပတ်သက်သည့် အကြောင်းအရာများအား http://www.ayarunicodegroup.org/ တွင် တင်ဆက် ပေးထားကြောင်း သိရှိရသည်။

ဧရာ မြန်မာစာလုံးများ နှင့် အင်စတော်လာ ရယူရန်

LEAVE A REPLY

Please enter your comment!
Please enter your name here