အမေရိကန်တို့၏ ရွေးကောက်ပွဲနှင့် မြန်မာတို့ အခွင့်အရေးများ (၂)

Click to enlarge

မေရိကန် နိုင်ငံသည် အင်အား ကြီးမားလှသည်။ အမေရိကန်နိုင်ငံသားတို့သည် ကောင်းပေ့ ညွှန့်ပေ့၊ အကောင်းတကာ့ အကောင်းဆုံး တို့ကို

 

 

မှီဝဲ သုံးစွဲကြသည်။ သူတို့သည် စားနိုင်၊ သောက်နိုင်ကြ သည့် အပြင် အိမ်ယာများ၊ ပညာရေး နှင့် ကျန်းမာရေး စသည့် အခြေခံ လူနေမှု စနစ် ကို ပြည့်ပြည့်ဝဝ ရရှိကြသည်။  ပြည့်ဝသည်ထက် ပိုလျှံ၍ပင် နေတော့သည်။ သက်တမ်းအားဖြင့် အနှစ် နှစ်ရာကျော်ကျော်သာ ရှိသေးသော အမေရိကန်နိုင်ငံသည် အဘယ်ကဲ့သို့သော အကြောင်းကြောင်း ကြောင့် အကောင်းဆုံးများကို သုံးစွဲနေကြရပါ သနည်း။ အမေရိကန်တို့၏ ဖွဲ့စည်း အုပ်ချုပ်ပုံ အခြေခံဥပဒေသည် လူသားတိုင်းအတွက် တန်းတူ တူညီသော အခွင့်အရေးကို ဦးစားပေးထားသည်။ လူတိုင်းအတွက် ကိုယ်ပိုင် လွတ်လပ်ခွင့် ပေးထားသည်။ ထိုသို့သော အခြေခံ အကြောင်းအရာများကြောင့် အမေရိကန်တို့၏ အခြေခံ ဥပဒေသည် လွန်ခဲ့သော နှစ်ပေါင်းများစွာက ရေးဆွဲခဲ့ကြသော်လည်း ယနေ့ထက်တိုင် မှန်ကန်စွာဦးဆောင်နိုင်ကြောင်း သက်သေပြလျက် ရှိပေသည်။

            အမေရိကန်တို့၏ ဒီမိုကရက်တစ်ပါတီ နှင့် ရီပတ်ပလစ်ကင်ပါတီတို့သည် လက်ရှိ နိုင်ငံရေး အခြေအနေနှင့် မိမိတို့၏ အာဘော်ကို လိုက်လျက် အခြေခံ ဥပဒေအပေါ် အနည်းငယ်မျှသော ဖြည့် စွက်ချက်များဖြင့် သီးခြား အခြေခံဥပဒေကို ပြဌါန်း တင်သွင်းကြသည်။

            လက်ရှိ အမေရိကန် သမ္မတ ဂျော့ဘွတ်ရှ်၏ ရှစ်နှစ်တာ ကာလာ အုပ်ချုပ်မှု လက်ထက်တွင် စစ်သုံးစရိတ်သည် အလွန်အမင်းများပြား ကြီးမြင့်လာသည်။ အခွန်အတုတ်သည်လည်း ကြီးမြင့်သည်။ စီပွားရေး လုပ်ငန်းရှင်များ၊ ကုမ္မဏီများသည် ကြီးမြင့်သော အခွန်အတုတ်တို့ကြောင့် အခြားတိုင်းပြည်တို့တွင် ပြောင်းရွှေ့ဖွင့်လှစ်ကြသည်။ ထို့အတွက် အမေရိကန်တွင် အလုပ်လက်မဲ့ ဦးရေတိုးပွားလာခဲ့ရသည်။ အလုပ်မရှိသည့် အတွက် အကြွေးနှင့် ဝယ်ယူထားသော အိမ်များကို အရှုံးခံ ပြန်ပေးအပ်ကြသည်။ နယ်များတွင် အိမ်၊ ခြံ၊ မြေဈေး တဟုန်ထိုး ကျဆင်းသွားသည်။ ဘဏ္ဍာရေး အင်းအားလည်း ချိနဲ့နေသည်။ ထိုသည့်အတွက် နိုင်ငံခြားမှ ပညာရှင်များအား အလုပ်အကိုင်အတွက် ခေါ်ယူသည့် နှုန်းနည်းသွားခဲ့သည်။ ကျောင်းများတွင် ပညာသင်ကြားရေးအတွက် ထောက်ပံ့ကြေးများလည်း လျော့နည်းသွားသည်။ ထောက်ပံ့ကြေးဖြင့် ကျောင်းတက်ရန် လာမည့် နိုင်ငံခြားမှ ကျောင်းသူ၊ ကျောင်းသားများအတွက် အခွင့်အလမ်များလည်း နည်းသွားသည်။ သမ္မတ ဂျော့ဘွတ်ရှ်၏ နောက်ဆုံးသက်တမ်း ကာလာများတွင် လူကြိုက်နည်းလာကြ ရသည့် အခြေခံ အကြောင်းအရင်းများပင် ဖြစ်တော့သည်။

            ဒီမိုကရက်တစ် ခေါင်းဆောင် အိုဘာမားသည် အသက်အားဖြင့် ငယ်ရွယ်သေးသော်လည်း စူးရှထက်မြက်သော လူမည်း ခေါင်းဆောင် တစ်ဦးဖြစ်သည်။ ပြုပြင်ပြောင်းလဲမှုများကို အလိုရှိသူ။ လက်ရှိ သမ္မတ ဂျော့ဘွတ်ရှ်၏ မပြီးဆုံးသေးသော အီရတ်နှင့် အာဖကန်နစ္စတန် စစ်ပွဲများမှ အမေရိကန် စစ်တပ်ကို ဆွဲထုတ်လျှက် အဆုံးသတ်လိုသည်။ အမေရိကန်တွင် အခြေချ နေထိုင်လျက်ရှိသော လူတန်းစားအားလုံးအတွင်း ကျန်းမာရေး၊ ပညာရေး၊ အလုပ်အကိုင်တို့ကို ထောက်ပံ့ပေးမည်ဟုလည်း ကတိပေးထားသည်။ တရိပ်ရိပ် ကျဆင်းနေသော အမေရိကန်တို့၏ စီပွားရေးနှင့် စစ်စရိတ်ကြောင့် ကုန်ခန်းနေသော အမေရိကန်တို့၏ ဘဏ္ဍာရေး အင်အား ပြန်လည် တောင့်တင်းလာစေရန် အလုပ်အကိုင်များ ဖန်တီးပေးမည်ဟု ဆိုသည်။ ဒီနေရာမှာ ဒီမိုကရက်တို့က လူတန်းစား အားလုံးဟုဆိုထားသည်။ ဒါကလည်း မှန်ပေသည်။ ဒီမိုကရက်တို့၏ အာဘော်သည် လူတိုင်း၊ အခြေခံ လူတန်းစားများ အပါအဝင် အားလုံးကို ကျန်းမားရေး၊ ပညာရေး၊ အလုပ်အကိုင် ထောက်ပံဖို့သာ ဖြစ်ပေသည်။  

            ဤတွင် အထက်တန်းစား အမေရိကန်တို့သည် ဒီမိုကရက်တို့၏ အာဘော်ကို မကြိုက်ကြ။ အလုပ်လုပ်သော အမေရိကန်တို့၏ အခွန်အတုတ်မှ ရလာသော ငွေကြေးတို့ဖြင့် အလုပ် မလုပ်၊ ကလေးမွေးနေသော မိခင်များကို အလကား ထောက်ပံနေသည်ကို မလိုလားကြ။ အခြားတိုင်းပြည်မှ အခြေလာချသော၊ ခိုလှုံခွင့်ဖြင့် လာကြသော သူများကို ငွေကြေး၊အစစအရာရာ ထောက်ပံ့နေကြသည်ကိုလည်း မကြိုက်ကြ။ အမေရိကန်တွင် အခြေချတာ ကြာမြင့်လျက် အမေရိကန် နိုင်ငံသား ဖြစ်သွားသော မြန်မာများကို တွေ့ဖူးပါသည်။ တစ်ချို့ ရီပတ်ပလစ်ကင်ဖက် ယိမ်းကြသည်။ သူတို့ အဆိုအရ သူတို့၏ အခွန်အတုပ်များဖြင့် အမေရိကန်ကို ဝင်ရောက် အခြေလာချသူများကို လုပ်ကျွေးနေကြရသည်ဟု ဆိုသည်။ သူရို့၏ တိုင်းပြည်သည် အမေရိကန်နိုင်ငံ ဖြစ်သွားကြလေ ပြီလော။

            ရီပတ်ပလစ်ကင်ခေါင်ဆောင် ဂျွန်မက်ကိန်းသည် နိုင်ငံခြားရေးရာတွင် ဝါရင့်ခေါင်းဆောင်တစ်ယောက် ဖြစ်သည်ဟု ကြွေးကြော်ထားသည်။ သူ၏ ပါတီသည် အမေရိကန်တို့၏ လုံခြံုမှုကို ဦးစားပေး လုပ်ဆောင်သွားမည်ဟု ဆိုသည်။ ပြိုင်ဖက် ဒီမိုကရက် ခေါင်ဆောင် အိုဘာမားကိုလည်း ဂျွန်မက်ကိန်းနှင့် စာလျှင် ဝါနုသေးသည်ဟု ထောက်ပြကာ ပါတီအတွက် မဲဆွယ်နေလျက် ရှိကြသည်။ အီရတ်နှင့် အာဖကန်နစ္စတန် စစ်ပွဲများတွင် အမေရိကန်တို့ စစ်ရှုံးကာ ဆုတ်ခွာကြရမည်ကို မလိုလားကြချေ။ ရီပတ်ပလစ်ကင်တို့သည် ပြုပြင်ပြောင်းလဲမှုကို မလိုလားကြ။ ထို့အပြင် အသစ်ခန့်အပ်လိုက်သော ရီပတ်ပလစ်ကင််တို့၏ အမျိုးသမီး ဒုတိယ သမ္မတလောင်း ဆာရာပေးလင်း သည် ဒီမိုကရက်ဖက်မှ အမျိုးသမီး ဆီနိတ်တာ ကလင်တန်(သမ္မတဟောင်း ဘီလ် ကလင်တန်၏ ဇနီး) ၏ မဲများကို သိမ်းကြံုးယူနိုင်ဖွယ်လည်း ရှိသည်။ ဆာရာပေလင်းသည် စကားပြောဆိုရာတွင် ထက်မြက်သလို အုပ်ချုပ်မှု အသစ်ကိုလိုလားသော ဆီနိတ်တာလည်း ဖြစ်သည်။ ထို့ကြောင့် အုပ်ချုပ်မှုအဟောင်းများနှင့် ပြုပြင်ပြောင်းလဲမှု မရှိသော ရီပတ်ပလစ်ကင်တို့၏ အာဘော်ကို ထောက်ပြရန် ဒီမိုကရက်တို့ အခက်အခဲ ကြံုနိုင်လေသည်။

            အသာစီးရှိလျက် ရှိသော ဒီမိုကရက်တို့သည် အသစ်ခန့်အပ်ထားသော ရီပတ်ပလစ်ကင်တို့၏ အမျိုးသမီး ဒုတိယ သမ္မတလောင်း ဆာရာပေးလင်း ကြောင့် အခြေအနေ တစ်မျိုး ပြောင်းလဲသွားဖွယ် ရှိသည်။ ထို့ အတူ တကယ်တမ်း နင်လား ငါလား မဲပေးကြသည်တွင် ရီပတ်ပလစ်ကင်တို့ နိုင်သွား နိုင်ပေသေးသည်။ ပြီးခဲ့သည့်လေးနှစ် ရွေးကောက်ပွဲတွင် ထိုကဲ့သို့ အဖြစ်အပျက်က ဖြစ်ခဲ့ ဖူးပြီးပြီ။ ထိုစဉ်က ဒီမိုကရက်တို့ နိုင်မလိုလိုနှင့် နောက်ဆုံးတော့ ဂျော့ဘွတ်ရှ်၏ ရီပတ်ပလစ်ကင် ပါတီက နိုင်သွားခဲ့သည် မဟုတ်ပါလော။

            ထို ဒီမိုကရက်နှင့် ရီပတ်ပလစ်ကင် တို့ အာဘော်သည် မြန်မာ နိုင်ငံနှင့် ကျွန်တော်တို့၏ မြန်မာ နိုင်ငံသားတို့ အပေါ် ဘယ်လို အကျိုးသက်ရောက် နိုင်မလဲဆိုတာ ကြည့် ကြရအောင်။ ရီပတ်ပလစ်ကင်တို့သည် စစ်ကိုနိုင်အောင် တိုက်သွားကြမည်ဟု ဆိုသည်။ ဘဏ္ဍာရေး အင်အား ချိနဲ့နေသော အမေရိကန်သည် မြန်မာနိုင်ငံရေးအပေါ် အကျိုးအမြတ် မရှိပဲ ငွေးကြေးအရ အကူအညီ ပေးဖို့ မဖြစ်နိုင်ချေ။ ထို့ကြောင့် အမေရိကန်တို့၏ ထောက်ပံ့စရိတ်ကို မှီခိုရန် ရည်ရွယ်နေကြသော မြန်မာ့နိုင်ငံရေးသမားမျာနှင့် ခိုလှုံခွင့်ရရန် အခွင့်အလမ်းရှာကြသော မြန်မာများအတွက် ခက်ခဲနိုင်သည်။ ယနေ့တိုင် အလုပ်အကိုင်တို့ကား ခက်ခဲလျက် စီးပွားရေးက ကျဆင်းနေဆဲပင်။ ထိုသည့် အတွက် ထူးချွန်ထက်မြက်သော မြန်မာများ H1-B ဟု ခေါ်သော အလုပ်သမား ပြည်ဝင်ခွင့်ဖြင့် အမေရိကန်နိုင်ငံ သို့ အလုပ်ရှာရန် လာဖို့ ခက်ခဲပေလိမ့်မည်။ အခုတောင် ကျွန်တော်၏ မိတ်တွေ သူငယ်ချင်း တော်တော်များ များ H1-B ပြည်ဝင်ခွင့် ဗီဇာယူထားပြီး အလုပ်ဖြင့် လာရန် ခက်ခဲနေကြရသည်။ တော်သေးသည်။ သူရို့သည် အိုင်တီနည်းပညာသမားများ ဖြစ်ကြသည့်နှယ် လိန်ဖယ် လိန်ဖယ်နှင့်တော့ အခွင့်အလမ်းများရသွား နိုင်ပါသေးသည်။

            ကျွန်တော်သည် အမေရိကန် နိုင်ငံသား မဟုတ်။ မြန်မာလူမျိုး အမေရိကန်နိုင်ငံတွင် ကိုယ်တတ်သည့် ပညာဖြင့် အလုပ်လုပ်မည့် သူ ဖြစ်သဖြင့် လူတန်းစား မရွေး လူတိုင်းကို အခွင့်အရေး ပေးမည့် ဒီမိုကရက်တို့၏ အာဘော်ကို သဘောကျသည်။ နောင်တွင်လည်း မြန်မာပညာတတ်များ၊ သူငယ်ချင်းများ အလုပ်လာလုပ်နိုင်ရန် အလုပ်အကိုင် အခွင့်အလမ်းများကို ဖန်တီးပေးမည့် ဒီမိုကရက်ကို ထောက်ခံမည်။ အမေရိကန် နိုင်ငံသားတို့ ရီပတ်ပလစ်ကင်ကို ထောက်ခံကာ သူတို့ တိုင်းပြည် လုံခြံုရေးကို ရှေးရှု့သည်ကာ သဘာဝကျသည်။ သို့ရာတွင် အမေရိကန်နိုင်ငံသည် လူမျိုး ပေါင်းစုံနှင့် ဖွဲ့စည်းထားသည်တော့ကာ ကျွန်တော်တို့လို နိုင်ငံခြားသားများလည်း ရှိသည်။ ထို့ပြင် ဝင်ငွေနည်းသော နိုင်ငံခြားသားများလည်း ကျန်းမားရေး ထောက်ပံ့မှုများ ရမည်ဆိုလျှင် မကောင်းပါလော့။

            အမေရိကန်တို့ မြန်မာနိုင်ငံရေး အပေါ် အကျိုးသက်ရောက်နိုင်မည်ကို ကျွန်တော် အယုံအကြည် မရှိ။ နိုင်ငံရေးကို အကြောင်းပြလျက် အကျိုးခံစားနေကြသော နိုင်ငံရေးသမားများကိုလည်း အထင်မကြီး။ မြန်မာနိုင်ငံ ရွေးကောက်ပွဲ ကျင်းပကြတော့မည်ဆိုလျှင် အနီးကပ်မှ ထအော်ကြမည့် လူများလည်း ရှိပေလိမ့်မည်။ ကျွန်တော်တို့ မြန်မာနိုင်ငံရေးသည် ပြည်သူလက်ထဲ၌တွင် ရှိကာ ပြည်သူတွေသာ ဆုံးဖြတ်ကြရမည်။ ကျွန်တော့် အနေဖြင့် အခြားနိုင်ငံများမှ နိုင်ငံရေး ဇာတ်ခုံများနှင့် မြန်မာ နိုင်ငံရေး ဇာတ်ခုံတို့ မတူညီ သည်များကို ပြောပြရုံသာ ဖြစ်သည်။ တိုင်ပြည်အတွင်း ပိတ်ဆို့ခံရလျှက် နိုင်ငံတကာ အမြင်နည်းနေသော မြန်မာများအတွက် နိုင်ငံတကာတွင် ဘာတွေဖြစ်ပျက်နေသလဲ၊ မြန်မာပြည်နဲ့ ဘာတွေ ခြားနားသလဲ၊ ဘယ်လိုမျိုး အခွင့်အရေးတွေ ဆုံးရှုံးနေကာ၊ ဘယ်လိုမျိုး အခွင့်အရေးတွေ တောင်းဆိုသင့်သလဲလို့ ကိုယ်မြင်သည့် ရှု့ထောင့်မှ ပြောပြရုံပင် ဖြစ်သည်။ အထူးသဖြင့် ဘယ်လိုမျိုး နိုင်ငံခေါင်းဆောင်ကို တင်မြောက်ကြမလဲပေါ့။


အနန္တမေတ္တာဖြင့်
ဘကောင်း

 

 

LEAVE A REPLY

Please enter your comment!
Please enter your name here