Georgia – Russia ဂျော်ဂျီယာနှင့် ရုရှားစစ်ပွဲကြီး အခြေအနေ (မျိုးဖြုတ်စစ်ပွဲ)

ရုရှားနှင့် ယခင်ဆိုဗီယက်ပြည်ထောင်စုု ဂျော်ဂျီယာ တို့ တိုက်ခိုက် မှုအခြေအနေသည် ၉-၈-၂၀၀၈ (စနေနေ့)တွင် စစ်ပွဲကြီး ဖြစ် လုနီးပါး အခြေ အနေသို့ ရောက်ရှိခဲ့ ပါသည်။ အကြောင်း မှာ ရုရှားမှ စစ်သင်္ဘော များ စေလွှတ်၍ မြေပြင် တပ်ဖွဲ့များ ခြေကုတ် ယူခြင်း နှင့် ဂျော်ဂျီယာ တစ် လျှောက် ဗုံးကြဲမှုများ

ကို ပိုမိုပြုလုပ်လာခြင်းကြောင့် ဖြစ်ပါသည်။

တိုက်ခိုက်မှု သည် ဂျော်ဂျီယာ တပ်ဖွဲ့များက ရုရှား ကိုလိုလား သည့် တောင်ဩစက်တီအာ (Ossetia) မြို့တော်ကို ပြန်လည် သိမ်းပိုက် ရန်ကြိုးပမ်း မှုမှ စတင်ဖြစ်ပွား ခဲ့ခြင်းဖြစ် ပါသည်။ တောင် ဩစက်တီအာ ဒေသမှာ ၁၉၉၀ခုနှစ်များ အစောပိုင်း တွင် ဂျော်ဂျီယာမှ လက်တွေ့ ကိုယ်ပိုင် အုပ်ချုပ်ခွင့် (De Facto Autonomy) ရရှိခဲ့သော ဒေသ ဖြစ်ပါသည်။

ရုရှားတပ်များ ပိုမိုဝင်ရောက်လာခြင်းနှင့် ဗုံးများကြဲချမှု ပိုမိုပြုလုပ်လာခြင်းကြောင့် ရုရှားအနေဖြင့် တောင်ဩစက်တီအာနှင့် အက်ခါဇီးယား (Abkhazia)ကို သိမ်းပိုက်ရန် ဆုံးဖြတ်ချက်ကို ပိုမို ပေါ်လွင်လာစေ ပါသည်။ အဆိုပါ သီးခြားလွတ်လပ်သောဒေသများရှိ ပြည်သူများကို ရုရှားမှ ပါ့စ်ပို့စ်(passports)များ ထုတ်ပေး၍ ရုရှားနိုင်ငံသားများအဖြစ် ကြေငြာခဲ့ပါသည်။

ဂျော်ဂျီယာသမ္မတ မီဟေးဆာကာရှ်ဗီလီ (Mikheil Saakashvili)မှ ရုရှား၏ရည်ရွယ်ချက်သည် ကြီးမားပြီး ပင်လယ်ဆိပ်ကမ်းများနှင့် ရေနံပိုက်လိုင်းများကို သိမ်းပိုက်ရန်နှင့် ၎င်း၏အစိုးရကို ဖယ်ရှား ပစ်ရန် ဖြစ်သည်ဟု ပြောကြားပါသည်။

ရုရှားဝန်ကြီးချုပ် ဗလာဒီမာပူတင် (Vladimir V.Putin)သည် တရုတ်အိုလံပစ်မှ ထွက်ခွာ၍ စနေနေ့ ညနေတွင် ရုရှားတောင်ပိုင်းရှိ စစ်ဖြစ်ရာနေရာ ဩစက်တီအာ (Ossetia)မြို့နှင့် နယ်နမိတ်ကပ်လျက်ရှိသည့် နယ်ခြားမြို့ ဗလာဒီကာကဇ် (Vladikavkaz) သို့ ရောက်ရှိခဲ့ပါသည်။ အစိုးရ အသံလွှင့်ဌာနမှ ပြောကြားသည်မှာ မစ္စတာပူတင်အနေဖြင့် ဗိုလ်ချုပ်များနှင့်တွေ့ဆုံပြီး လက်ရှိ သမ္မတ ဒီမီထရီမက်ဗီဒက်ဗ် (Dmitri A.Medvedev)၏ အာဏာကို လွှမ်းမိုး၍ စစ်ဆင်ရေး တာဝန်များကို တိုက်ရိုက်ကွပ်ကဲမည် ဖြစ်ကြောင်း ပြောကြားသွားပါသည်။

မစ္စတာပူတင်မှ တောင်ပိုင်းဩစက်တီအာ၌ ပြည်သူဒါဇင်ပေါင်းများစွာေသေကြေပြီး ထောင်သောင်း မက ပြည်သူများ ထွက်ပြေးတိမ်းရှောင်နေရသည်ဟု ပြောကြားပါသည်။ ဂျော်ဂျီယာကျန်းမာရေးဝန်ကြီးမှ ပြည်သူ (၈၀)ကျော်မှာ သေဆုံးခဲ့ပြီး၊ အဆိုပါသေဆုံးမှုတွင် ဂိုရီမြို့(Gori) ဗုံးကြဲချရာ၌ ပြည်သူ အယောက် (၄၀)အပါအဝင် ဖြစ်သည်ဟု ပြောကြားပါသည်။ ဂိုရီမြို့မှာ ဂျော်ဂျီယာမြို့တော် တဘီလီဆီ (Tbilisi)၏ မြောက်ပိုင်းတွင် ရှိပါသည်။ ဂျော်ဂျီယာအစိုးရအရာရှိက ပြည်သူအများဆုံးပါ၀င်သည့် လူ(၈၀၀)မှာ ဒဏ်ရာ ရရှိ သွားကြောင်း ပြောကြားပါသည်။ နှစ်ဖက်ကြေညာသော သေကြေဒဏ်ရာရသူများစာရင်းကို အတည် ပြုရန်မှာ ခက်ခဲလျက် ရှိပါသည်။

ရုရှားနှင့် ဂျော်ဂျီယာ အခြေအနေမှာ စစ်အေးတင်းမာမှုပုံစံကို ပြန်လည်ဖြစ်ပေါ်ပြီး ဒေသတွင်း အရှေ့အနောက် အာဏာလွှမ်းမိုးရေးအတွက် အားပြိုင်မှုများကို ဖြစ်ပေါ်စေလျက် ရှိပါသည်။ (၉-၈-၂၀၀၈) စနေနေ့တွင် ပြုလုပ်သည့် ကုလသမဂ္ဂလုံခြံုရေးကောင်စီအစည်းအဝေးအနေဖြင့် ယခုလက်ရှိ ပဋိပက္ခစစ်ပွဲအတွက် ဆွေးနွေးရာ၌ ဆုံးဖြတ်ချက်များ ချနိုင်ခဲ့ခြင်းမရှိခဲ့ပါ။

ဂျော်ဂျီယာ အစိုးရအရာရှိများမှ ယခုလက်ရှိပဋိပက္ခစစ်ပွဲ ပြေငြိမ်းစေရန်မှာ အမေရိကန်အနေဖြင့် ပါ၀င်စေလိုကြောင်း၊ စစ်တပ်ဖြင့် ၀င်ရောက်ခြင်းမဟုတ်ဘဲ ရုရှားတိုက်ခိုက်မှုကို ရပ်တန့်ရန် သံတမန် နည်းအရ ဖိအားပေးရန်ဖြစ်သည်ဟု ပြောကြားပါသည်။

ဂျော်ဂျီယာမှာ ကိုယ်ပိုင်အုပ်ချုပ်ခွင့်ရှိသည့် နိုင်ငံဖြစ်ကြောင်း၊ ၎င်း၏နယ်နမိတ်တည်တံ့ရေးကို လေးစားလိုက်နာရမည်ဖြစ်ကြောင်း၊ စစ်ရေးအရ အကြမ်းဖက်ခြင်းနှင့် တပ်များဖြင့် ၀င်ရောက်တိုက်ခိုက်မှုကို ရပ်တန်းမှ ရပ်ရန်ဖြစ်ကြောင်းအပြင် ရုရှားမှ ဗုံးကြဲတိုက်ခိုက်မှုများကိုလည်း အဆုံးသတ်ရန်ဖြစ်ကြောင်း သမ္မတဘွတ်ရှ်မှ ပီကင်းအိုလံပစ်ပွဲတော်တွင် ပြောကြားတောင်းဆိုခဲ့ပါသည်။

ဥရောပသမဂ္ဂအရာရှိများက စနေနေ့အဖြစ်အပျက် ပဋိပက္ခပြင်းထန်မှုမှာ ရုရှာနှင့်ဂျော်ဂျီယာ နှစ်နိုင်ငံလုံးကို အပြစ်တင်ရမည်ဖြစ်ကြောင်း၊ ၎င်းတို့၏ ရည်ရွယ်ချက်မှာ အပစ်အခတ်ရပ်စဲရေးဖြစ်ကြောင်း နှင့် ဥရောပအထူးသံတမန်ကို အဆိုပါဒေသသို့ စေလွှတ်မည်ဖြစ်ကြောင်း ပြောကြားသွားပါသည်။ အခြား အနောက်နိုင်ငံအစိုးရအရာရှိများက ရုရှားသည် စစ်ရေးအရ လေကြောင်းနှင့် ရေကြောင်းမှ အပြည့်အဝ တိုက်ခိုက်နေကြောင်း၊ မိမိတို့အနေဖြင့် နိုင်ငံရေးအရလည်းကောင်း၊ ဥပဒေကြောင်း အရလည်းကောင်း၊ သံတမန်နည်းလမ်းအရလည်းကောင်း ဆောင်ရွက်ရမည့် အခြေအနေသို့ ရောက်ရှိနေပါကြောင်းဖြင့် ပြောကြား သွားပါသည်။

ရုရှားအနေဖြင့် အက်ခါဇီးယားမြို့ (Abkhazia)ကို ဒုတိယစစ်မျက်နှာဖွင့်လှစ်တိုက်ခိုက်ဟန် ရှိပါသည်။ ၎င်းမြို့မှာ တောင်ပိုင်းဩစက်တီအာ၏ အနောက်ပိုင်းတွင် ရှိပါသည်။ ထို့ပြင် ကိုဒိုရီဂျော့ (Kodori Gorge)မှ ဂျော်ဂျီယာစစ်တပ်ကို မောင်းထုတ်ရန် ရည်ရွယ်ပါသည်။

ကိုဒိုရီဂျော့မှာ အက်ခါဇီးယားမြို့၏ တောင်ထူထပ်ရာနေရာဖြစ်ပြီး ၂၀၀၆ခုနှစ် ဂျော်ဂျီယာနိုင်ငံမှ အင်အားအသုံးပြု၍ သိမ်းပိုက်ထားသောမြို့ ဖြစ်ပါသည်။ အက်ခါဇီးယားကို လက်တွေ့ကိုယ်ပိုင် အုပ်ချုပ်နေသည့် အစိုးရ၏ မေတ္တာရပ်ခံချက်အရ ကုလသမဂ္ဂငြိမ်းချမ်းရေးတပ်ဖွဲ့များ ရုတ်သိမ်းပြီးနောက် ရုရှားဂျက်လေယာဉ်(၁၂)စီးက ၎င်းနေရာကို ဗုံးကြဲတိုက်ခိုက်နေခဲ့သည်ဟု ဂျော်ဂျီယာအစိုးရ အရာရှိများက ပြောကြားခဲ့ပါသည်။

ရုရှားမှ ၎င်း၏ပင်လယ်နက်ရှိ ရေတပ်သင်္ဘောများကို အက်ခါဇီးယား(Abkhazia) ကမ်းရိုးတန်း ဆိပ်ကမ်းမြို့ဖြစ်သည့် အိုချမ်ချီအာ (Ochamchire)သို့ စေလွှတ်လိုက်ကြောင်း၊ အနောက်နိုင်ငံ အစိုးရများသို့ အသိပေးပြောကြားခဲ့ပါသည်။ ထိုသို့ စေလွှတ်ခြင်းမှာ ရုရှားတပ်များ ခြေချရန် ဖြစ်သည်ဟု ဂျော်ဂျီယာအစိုးရအရာရှိများက ပြောကြားခဲ့ပါသည်။

မစ္စတာပူတင်မှ တောင်ဩစက်တီအာဒေသများကို လွတ်လပ်စေရန်တောင်းဆိုမှုများသည် ခိုင်မာမှု မရှိကြောင်း၊ ရုရှားအနေဖြင့် တပ်ရုတ်သိမ်းပေးရန် ရည်ရွယ်ချက်မရှိကြောင်း၊ ဗိုနေမြဲ ကျားနေမြဲ အခြေအနေသို့ ပြန်သွားရန် မစဉ်းစားကြောင်းဖြင့် ရုရှားအစိုးရရုပ်သံမှ ပြောကြားခဲ့ပါသည်။

ဂျော်ဂျီယာသမ္မတ မစ္စတာဆကာရှီှဗီလီ (Mr.Saakashivilli)က ရုရှား၏ ရေနံကြွယ်ဝမှုနှင့် ဥရောပအပေါ် စီးပွားရေးအရ လွှမ်းမိုးချင်သော လိုအင်နှင့် အနောက်နိုင်ငံများမှ တိုက်ခိုက်ရန် တွန်းအားပေး မှုများကြောင့် ဖြစ်သည်ဟု ပြောကြားခဲ့ပါသည်။ ဂျော်ဂျီယာမှာ ယခင် ဆိုဗီယက်ပြည်ထောင်စုမှ ရေနံနှင့် သဘာဝဓါတ်ငွေ့များ တင်ပို့ရန်အတွက် ကြားခံနိုင်ငံဖြစ်ပြီး ရုရှား၏ လက်ဝါးကြီးအုပ် တစ်ဦးတည်း ပိုင်ဆိုင်လိုမှုအတွက် အခြိမ်းအခြောက်ခံနေရသော နိုင်ငံဖြစ်သည်ဟု ထပ်လောင်း ပြောကြားခဲ့ပါသည်။

ဂျော်ဂျီယာသမ္မတမှ ရုရှားတို့သည် လောင်စာပို့ရာလမ်းကြောင်းကို ထိန်းချုပ်လိုခြင်း၊ ပင်လယ် ဆိပ်ကမ်းများလိုအပ်ခြင်းနှင့် ပို့ဆောင်ရေး အခြေခံအဆောက်အအုံလိုအပ်ခြင်းတို့ကြောင့် လည်းကောင်း၊ အဓိကအားဖြင့် မိမိတို့ကို ဖယ်ရှားလိုခြင်းကြောင့်လည်းကောင်း ဖြစ်သည်ဟု ထပ်လောင်းပြောဆိုပါသည်။

ရုရှားအစိုးရအရာရှိများက ဂျော်ဂျီယာကို နေတိုး(NATO)အဖွဲ့ဝင် ဖြစ်စေလိုသည့် သမ္မတ ဆကာရှီဗီလီအား အမေရိကန်အစိုးရနှင့် ဆက်နွယ်မှုများကြောင့် ယခုစစ်ရေးပဋိပက္ခကို ဖန်တီးရန် တွန်းအားပေးခဲ့ခြင်းဖြစ်ကြောင်း၊ သို့ရာတွင် ၎င်းအနေဖြင့် အမေရိကန်နိုင်ငံမှ မည်မျှအကူအညီရနိုင်မည်ကို သံသယဖြစ်လျက်ရှိကြောင်း ပြောကြားခဲ့ပါသည်။ အကြောင်းမှာ ဂျော်ဂျီယာနိုင်ငံအနေဖြင့် အီရတ်စစ်ပွဲတွင် အမေရိကန်တို့ကို တပ်ဖွဲ့စေလွှတ် အကူအညီပေးခဲ့ပါသည်။

သောကြာနေ့ (၈-၈-၂၀၀၈)တွင် ပင်တဂွန်အရာရှိများက ဂျော်ဂျီယာအစိုးရမှ အီရတ်တွင်ရှိသည့် ဂျော်ဂျီယာတပ်သား ၂,၀၀၀ခန့်ကို မိမိနိုင်ငံသို့ လေကြောင်းအကူအညီဖြင့် ပြန်ပို့ပေးရန် မေတ္တာရပ်ခံ ထားပါကြောင်း၊ အဆိုပါ မေတ္တာရပ်ခံချက်အပေါ် စဉ်းစားနေပါကြောင်းနှင့် သတ်မှတ်ထားသော လုပ်ထုံး လုပ်နည်းများအရ၊ အမေရိကန်အနေဖြင့် လိုက်လျောလိမ့်မည်ဖြစ်ကြောင်း ပြောကြားခဲ့ပါသည်။

ဂျော်ဂျီယာနိုင်ငံ၏ အမျိုးသားလုံခြံုရေးကောင်စီ အတွင်းရေးမှူးဖြစ်သူ အလက်ဇင်ဒါလိုမာယာ (Alexander Lomaya)က ကမ္ဘာ့နိုင်ငံများအနေဖြင့် ရုရှားကျူးကျော်မှုကို ရပ်တန်းက မရပ်ပေးနိုင်ပါက ရုရှားတင့်ကားများနှင့် ရုရှားလေထီးတပ်များ ဥရောပနိုင်ငံမြို့တော်တိုင်းတွင် အခြေချလာမည်ဖြစ်ကြောင်း ပြောကြားခဲ့မှုအပေါ် ရုရှားအစိုးရ အရာရှိများက ပဋိပက္ခကို ရှုပ်ထွေးစေရန်နှင့် ၎င်းတို့၏ ရည်မှန်းချက်သည် ကျဉ်းမြောင်းပါကြောင်းဖြင့် ပြစ်တင်ပြောကြားခဲ့ပါသည်။

ရုရှားသမ္မတ မက်ဗီဒက် (Medvedev)က ငြိမ်းချမ်းရေး ပြန်လည်ရရှိရန်၊ မိမိတို့နိုင်ငံသားနှင့် ငြိမ်းချမး်ရေးတပ်သားများအပေါ် ဂျော်ဂျီယာတပ်များက တိုက်ခိုက်မှုအပေါ် ကာကွယ်ဆောင်ရွက်နေ ပါကြောင်း ပြောကြားခဲ့ပါသည်။

သတင်းစာရှင်းလင်းပွဲတွင် ရုရှားနိုင်ငံခြားရေး ၀န်ကြီးဆာဂေးလာရိုဗ် (Sergey V.Lavrov)က ဂျော်ဂျီယာတိုက်ခိုက်မှုသည် တောင်ပိုင်းဩစက်တီအာမြို့ရှိ ရုရှားနိုင်ငံသားများကို မျိုးဖြုတ်ရှင်းလင်းပစ်မှုပင် ဖြစ်ကြောင်းနှင့် ဂျော်ဂျီယာသမ္မတ မစ္စတာဆာကရှီဗီလီ (Mr.Saakashvilli)နှင့် ၎င်း၏အနောက်နိုင်ငံ မိတ်ဆွေများဟူ၍ ရည်ညွှန်းပြစ်တင်သွားပါသည်။ အနောက်နိုင်ငံမိတ်ဆွေများမှာ အမေရိကန်နိုင်ငံဖြစ်ပြီး မစ္စတာဆာကရှီဗီလီ ၂၀၀၄ခုနှစ် သမ္မတရာထူးရရှိစဉ်ကတည်းက စစ်ရေးအကူအညီများကို အကြီးအကျယ် ပေးခဲ့ခြင်းဖြစ်သည်။

ရုရှား၏ ပင်လယ်နက်ရေတပ်ဖွဲ့၏ အကူအညီဖြင့် စစ်လေယာဉ်များနှင့်တင့်ကားများသည် တောင်ထူထပ်သည့်မြို့ကလေးကို တိုက်ခိုက်လျက်ရှိပါသည်။ ဂျော်ဂျီယာအစိုးရ အရာရှိများက မိမိတို့ အနေဖြင့် ယခုလို ရုရှားမှ အလုံးအရင်းဖြင့် ထိုးစစ်ဆင်နွှဲမှုအပေါ် အံ့ဩမိပါကြောင်း ၀န်ခံ ပြောကြားခဲ့ပါသည်။

ရုရှားအနေဖြင့်လည်း ပြန်လည်ခုခံမှုများနှင့် ရင်ဆိုင်ရလျက်ရှိပါသည်။ ဂျော်ဂျီယာတပ်များအနေဖြင့် ရုရှား၏ စစ်လေယာဉ် (၂)စီးကို ပစ်ချခဲ့ကြောင်း ရုရှားမှ ၀န်ခံခဲ့ပါသည်။ ဂျော်ဂျီယာ အမျိုးသားလုံခြံုရေးကောင်စီ အတွင်းရေးမှူး မစ္စတာ အလက်ဇင်ဒါလိုမာယာက ဂျော်ဂျီယာ အနေဖြင့် ရုရှားဂျက်လေယာဉ်(၁၀)စီး ဖျက်စီးခဲ့ကြောင်း ပြောကြားပါသည်။

ဂျော်ဂျီယာသမ္မတ၏ အနီးကပ်ပုဂ္ဂိုလ်ဖြစ်သူ ပါလီမန်အမတ် မစ္စတာဂျီဂိုဘိုကာရီအာနော (Mr.Gigo Bokarianot)က ဂျော်ဂျီယာအနေဖြင့် နည်းဗျူဟာကို လေကြောင်းကာကွယ်ရေးဘက်သို့ ဦးတည်ပြောင်းလဲ ဆောင်ရွက်နေပါကြောင်း ပြောကြားသွားပါသည်။ ဂိုရီ (Gori)မြို့တွင် ပြည်သူများက ပစ်ချခြင်း ခံရသည့် ဂျက်လေယာဉ်မှ ရုရှားလေသူရဲ ခုန်ထွက်သွားမှုကို ကြည့်၍ လက်ခုပ်တီး အားပေးကြပါသည်။ ဂျော်ဂျီယာ ရုပ်မြင်သံကြားမှ လေသူရဲ၏ သွေးစွန်းနေသော လေယာဉ်မောင်းဦးထုပ်ကို ပြသခဲ့ပြီး လေသူရဲကို ဖမ်းမိထားကြောင်း ကြေငြာသွားပါသည်။

စစ်ပွဲစတင်သည်မှ (၃)ရက်အကြာတွင် ဂျော်ဂျီယာနိုင်ငံပေါ်၌ ပထမဦးဆုံးအဖြစ် ရုရှားဗျူဟာမြောက် ဗုံးကြဲလေယာဉ်များကို မြင်တွေ့ခဲ့ရပါသည်။ ဂျော်ဂျီယာတင့်ကားများသည် ရုရှားနှင့် တောင်ပိုင်း ဩစက်တီအာကို ဆက်သွယ်ထားသော တစ်လမ်းထဲရှိသည့်လမ်းကို ရုရှားထောက်ပံ့ရေးလမး်ကြောင်းအဖြစ် သုံးစွဲမှုမှ ရပ်တန့်အောင် တိုက်ခိုက်လျက် ရှိပါသည်။ သို့ရာတွင် ရုရှားအနေဖြင့် ဂျော်ဂျီယာပြည်နယ်ထဲသို့ တပ်များကို ပို့လွှတ်လျက်ရှိပြီး တိုက်ခိုက်မှုကို အနည်းဆုံး (၂)ဆဖြစ်အောင် ဆောင်ရွက်လျက်ရှိပါသည်။ ဂျော်ဂျီယာ အစိုးရ အရာရှိများ က ရုရှားတပ်သား ၂၅,၀၀၀ အနည်းဆုံး တောင်ပိုင်းဩစက်တီအာတွင် ရောက်ရှိနေ ကြပြီဟု ဆိုပါသည်။

ပြည်သူများအနေဖြင့် နှစ်ဖက်တိုက်ခိုက်မှုအောက်သို့ ရောက်ရှိနေပါသည်။ ဂျော်ဂျီယာတပ်များက တောင်ဩစက်တီအာမြို့တော်ဖြစ်သော တာရှ်အင်ဗာလီ (Tskhinvali)ကို အမြောက်များဖြင့် ပစ်ခတ်လျက် ရှိပါသည်။ ရုရှားရုပ်မြင်သံကြားမှ ပျက်စီးသွားသည့် အဆောက်အအုံများနှင့် လူနေ တိုက်ခန်း များကို ပြသခဲ့ပါသည်။

ရုရှားစစ်လေယာဉ်များအနေဖြင့် ဂျော်ဂျီယာမြို့ အနည်းဆုံး (၅)မြို့ကို တိုက်ခိိုက်ခဲ့ပါသည်။ မျက်မြင်သက်သေအဆိုအရ၊ တီဆင်နာခီ (Tsenakhi)မြို့တွင် ဘူတာရုံ၊ ဂိုရီမြို့ (Gori)တွင် လူနေတိုက်ခန်း (၅)ခန်းနှင့် ပိုတီမြို့ (Poti)၏ ပင်လယ်နက်ဆိပ်ကမ်းတို့ကို တိုက်ခိုက်ခဲ့သည်ဟု ဆိုပါသည်။

ဂျော်ဂျီယာအစိုးရ အရာရှိများက ရုရှား၏လေယာဉ်များသည် အရေးပါသည့် ဘာကူ-တာဘီလီဆီ- ဆေဟန် (Baku-Tblisi-Ceyhan) ရေနံ ပိုက်လိုင်းကို တိုက်ခိုက်ခဲ့ပါကြောင်း ပြောကြားပါသည်။ အဆိုပါ ရေနံပိုက်လိုင်းမှာ British Petroleum (ဗြိတိသျှရေနံ ကုမ္ပဏီ)မှ ဆောင်ရွက်လျက်ရှိပြီး အာရှမှ အနောက်နိုင်ငံများသို့ တင်ပို့နေသော ပိုက်လိုင်းဖြစ်ပါသည်။ သို့ရာတွင် ထိုခိုက်ခြင်း မရှိဟု ဆိုပါသည်။

ရုရှားအာဏာပိုင်များက ၎င်းတို့၏တပ်များသည် တောင်ပိုင်းဩစက်တီအာမြို့တော်ကို ဂျော်ဂျီယာ ထိန်းချုပ်မှုအောက်မှ နံနက်ပိုင်းတွင် ပြန်လည်သိမ်းယူခဲ့ပါကြောင်း ပြောကြားသကဲ့သို့ ဂျော်ဂျီယာ အစိုးရ အရာရှိများက ၎င်းတို့၏တပ်များသည် မိမိတို့ ဆန္ဒအလျောက် ပြန်လည် ဆုတ်ခွာ ပေးခဲ့သည်ဟု ဆိုပါသည်။ သို့ရာတွင် စနေနေ့ (၉-၈-၂၀၀၈) နောက်ပိုင်းတွင် ဂျော်ဂျီယာ တပ်တင့်ကားများနှင့် လက်နက်ကြီးများက တောင်ပိုင်းမှ တိုက်ခိုက်ခြင်းဖြင့် တိုက်ပွဲများ ပြင်းထန်စွာ စတင်ဖြစ်ပွားလျက်ရှိသည်ဟု ရုရှား ရုပ်မြင်သံကြားမှ သတင်းပေးပို့ပါသည်။

ရုရှားတပ်သား (၁၂)ဦး သေဆုံးကြောင်း ရုရှားကာကွယ်ရေး ၀န်ကြီးဌာန ဗိုလ်ချုပ်ကြီး အနာတိုလီ နိုဂိုဗီဆင် (Anatoly Nogovitsyn) ပြောကြားချက်အရ သိရှိရပြီး ၊ ဂျော်ဂျီယာနိုင်ငံနှင့် စစ်ပွဲ ဖြစ်နေခြင်း (state of war)ဟုတ်မဟုတ်ကို ၎င်းအားမေးမြန်းရာ၌ မဟုတ်ကြောင်း ပြောကြား ခဲ့ပါသည်။

လမ်းများမှာ စစ်ပြေးဒုက္ခသည်များနှင့် ပိတ်နေပါသည်။ တောင်ဩစက်တီအာ ပြည်သူများသည် ရုရှားသို့ ထွက်ပြေးတိမ်ရှောင်လျက်ရှိပြီး ဂိုုရီမြို့( Gori)မှ ဂျော်ဂျီယာပြည်သူများသည် အရှေ့တောင် တဘလီဆီ (Tblisi)သို့ ထွက်ပြေးတိမ်းရှောင်လျက်ရှိပါသည်။ ရုရှားက တောင်ဩစက်တီအာမြို့မှ ပြည်သူ ၃၀,၀၀၀ ထွက်ပြေးတိမ်းရှောင်လျက်ရှိကြောင်း ပြောကြား ခဲ့ပါသည်။

လင်းဦး (စိတ်ပညာ)

 

 

 

LEAVE A REPLY

Please enter your comment!
Please enter your name here